Hyang Yesus puniki Galang Jagat
(Yohanes 8:12-59)
Ring bab nem, Hyang Yesus ngajahin paindikan Ida nenten tios roti urip. Nanging para anak Parisi sareng para pemimpin anak Yahudi bimbang kapining asal wit Idane.
2
12 Irika raris Hyang Yesus malih ngandika ring anake akeh sapuniki,
“Tiang niki galang jagat.
Sapa sira ja sane ngiring Tiang,
ipun nenten jagi mamargi ring kapetengan,
nanging ipun jagi madue galang sane ngicen urip.”
13 Raris para anak Parisinea mabaos kapining Hyang Yesus sapuniki,
“Ragane ngamaosang indik dewek Ragane praragan.
Punika mawinan baos Ragane nenten ja sah.”
14 Hyang Yesus raris masaur sapuniki,
“Yadiastun Tiang ngamaosang indik dewek Tiange praragan,
baos Tiange punika sah.
Krana Tiang uning asal Tiange tur kija Tiang jagi luas.
Nanging ragane makasami nenten uning asal Tiange,
tur kija Tiang luas.
15 Ragane ngakimin Tiang nganggen caran manusa ngakimin anak lianan.
Tiang nenten ngakimin sapa sira ja.
16 Nanging yening Tiang ngakimin anak lianan,
pastika pengakiman Tiange adil.
Krana nenten ja Tiang praragan sane ngakimin,
nanging Tiang ngakimin kasarengin olih Sang Hyang Aji sane ngutus Tiang.
17 Ring ukum agama Yahudine sampun katulis yening wenten kakalih anak sane ngamaosang paindikan patut,
babaosane punika sah.
18 Wenten kakalih sane ngamaosang indik Tiang,
inggih punika Tiang miwah Sang Hyang Aji sane ngutus Tiang.”
19 Raris para anak Parisine mabaos sapuniki,
“Dijake Ajin Ragane punika?”
Hyang Yesus raris masaur sapuniki,
“Ragane nenten uning Tiang utawi Ajin Tiange.
Yening ragane uning Tiang,
ragane pada uning Ajin Tiange.”
20 Makasami paindikan punika kanikayang olih Hyang Yesus,
risedek Ida ngajahin nampek ring kropak genah maturan jinah,
ring genah agung mabakti ring Sang Hyang Pengardib.
Nanging nenten wenten anak sane ngejuk Ida,
krana dereng galah Idane jagi nandang paindikane punika.
Hyang Yesus Nenten Mawit Saking Jagate
21 Raris malih Hyang Yesus ngandika ring ipun sami sapuniki,
“Tiang jagi luas.
Raris ragane jagi ngrereh Tiang,
nanging ring genah Tiange luas ragane nenten mresidayang mrika krana ragane pacang padem ulian dosan ragane.”
22 Raris para pemimpin Yahudine saling takenang sapuniki,
“Napike Ipun jagi ngamademang Raganyane,
santukan Ipun ngandika,
‘Ring genah Tiange luas,
Ragane nenten mresidayang mrika’?”
23 Raris Hyang Yesus ngandika ring ipun sami sapuniki,
“Ragane rauh saking sor,
nanging Tiang rauh saking baduur.
Ragane saking jagate sane jaat,
nanging Tiang nenten ja saking jagate sane jaat puniki.
24 Punika mawinan Tiang ngandikayang indik ragane jagi padem ulian dosan-dosan ragane.
Sujatine ragane jagi padem sekadi punika yening ragane nenten pracaya kapining Tiang,
sane kasambat Tiang Wenten.c”
25 Raris para anak Parisine mataken sapuniki,
“Sujatine sirake ragane?”
Hyang Yesus ngandika sapuniki,
“Sekadi sane sampun Tiang pidartayang kapining ragane saking pengawit.
26 Sujatine akeh pisan sane musti raosang lan akimin Tiang indik ragane.
Nanging ring gumine puniki Tiang wantah ngraosang sekancan sane pirengin Tiang saking Sang Hyang Aji sane ngutus Tiang.
Ida sane patut kapracayain.”
27 Nanging ipun sami nenten ja ngerti pengandikan Hyang Yesuse punika indik Sang Hyang Aji.
28 Punika mawinan Hyang Yesus ngandika ring para anak Parisine sapuniki,
“Sasampune Tiang,
Sang Putraning Manusad,
kaunggahang olih ragane,
ragane jagi uning Tiang sane kasambat Tiang Wenten.
Turmaning ragane jagi uning makasami sane laksanayang Tiang nenten ja manut pikayunan Tiange praragan.
Tiang wantah ngandikayang napi sane kaajahin olih Sang Hyang Aji kapining Tiang.
29 Ida sane ngutus Tiang setata nyarengin Tiang.
Tur Ida nenten nilarin Tiang praragan,
krana Tiang setata nglaksanayang paindikan sane ngranayang Ida seneng.”
30 Sasampune Hyang Yesus ngandikayang paindikane makasami punika,
akeh wenten anake sane pracaya kapining Ida.
Paindikan Sane Patut Jagi Mebasang Manusa saking Dosa
31 Raris Hyang Yesus ngandika ring anak Yahudine sane pracaya ring Ida sapuniki,
“Yening ragane satya nglaksanayang sekancan pengajahan Tiange puniki,
ragane yakti pengiring Tiange.
32 Ragane jagi uning paindikan sane patut saking Sang Hyang Pengardi,
tur paindikane sane patut punika ngranayang ragane jagi kabebasang.”
33 Raris wenten sane masaur sapuniki,
“Napi mawinan Ragane ngandikayang sekadi puniki,
‘Ragane sami jagi kabebasang?’
Tiang sami nenten taen dados parekan ring sapa sira ja.
Tiang puniki soroh sentanan dane Abraham!”
34 Raris Hyang Yesus ngandika sapuniki,
“Tiang ngandikayang sane patut,
sujatine sapa sira ja sane malaksana dosa,
ipun kaucap parekan dosa.
35 Umpamine,
anake sane mamarekan nenten ja madue genah langgeng ring kaluargan pamekelnyane.
Nanging okan pamekelnyane punika tetep madue genah ring kaluargannyane salamin-laminne.
36 Sane mangkin,
yening Sang Putra mebasang ragane sami,
yakti-yakti ragane kabebasang.
37 Tiang uning ragane soroh sentanan dane Abraham.
Nanging ragane meled ngamademang Tiang,
krana ragane nenten kayun nerima pengajahan Tiange.
38 Tiang ngandikayang napi sane cingakin Tiang saking Ajin Tiange.
Nanging ragane nglaksanayang napi sane ragane plajahin saking bapan ragane.”
39 Raris ipun sami masaur sapuniki,
“Ajin tiange dane Abraham.”
Irika raris Hyang Yesus nyaurin sapuniki,
“Sujatine,
ragane nenten ja soroh sentanan dane Abraham krana parilaksanan ragane nenten nulad parilaksanan dane Abraham.
40 Tiang ngajahin paindikan sane patut kapining ragane,
inggih punika pengajahan sane pirengin Tiang saking Sang Hyang Pengardi.
Yadiastun asapunika,
ragane meled ngamademang Tiang.
Dane Abraham nenten malaksana sekadi punika!
41 Punika muktiang ragane nglaksanayang pakaryan bapan ragane sane lianan.”
Raris ipun sami masaur sapuniki,
“Tiang makasami nenten ja pianak babinjat.
Ajin tiange wantah siki,
inggih punika Sang Hyang Pengardi.”
42 Raris Hyang Yesus ngandika sapuniki,
“Yening Sang Hyang Pengardi yakti Ajin ragane,
ragane jagi tresna asih kapining Tiang,
krana asal Tiange saking Sang Hyang Pengardi.
Tiang rauh nenten ja saking pikayunan Tiange praragan,
nanging Ida sane ngutus Tiang.
43 Ragane nenten kayun ngresepang pengajahan Tiange.
Punika mawinan ragane nenten ngerti pengandikan Tiange.
44 Ratun para setane mula bapan ragane tur ragane misadya ninutin ia.
Sujatine,
saking pengawitne ratun para setane ngamademang manusane.
Ia tusing taen malaksana ane patut krana tusing ada paundukan ane patut sid dewek iane.
Yening ia mogbog,
ento mula bikasne,
krana ia mula tukang dusta lan asal sekancan dustane.
45 Nanging krana Tiang ngandikayang paindikan sane patut,
punika mawinan ragane nenten pracaya kapining Tiang.
46 Wentenke anake iriki sane prasida muktiang yening Tiang madue dosa?
Yening Tiang ngandikayang paindikan sane patut saking Sang Hyang Pengardi,
ngudake ragane nenten pracaya kapining Tiang?
47 Anake sane maasal saking Sang Hyang Pengardi,
mirengin pengandikan Idane.
Nanging ragane sami nenten ja maasal saking Sang Hyang Pengardi.
Punika mawinan ragane nenten kayun mirengin pengandikan Idane.”
48 Raris para pemimpin Yahudine nganistayang Hyang Yesus sapuniki,
“Baos tiange sami patut:
ragane anak Samariae sane karangsukin buta kalane!”
49 Irika raris Hyang Yesus ngandika sapuniki,
“Tiang nenten ja karangsukin buta kala.
Tiang bakti kapining Ajin Tiange,
nanging ragane nganistayang Tiang.
50 Tiang nenten ja ngrereh kaagungan dewek Tiange praragan,
nanging wenten Asiki sane ngranayang Tiang kaagungang.
Tur Ida dados akim sane adil.
51 Tiang ngandikayang sane patut,
sujatine anake sane ninutin pengajahan Tiange,
nenten ja jagi padem salamin-laminne.”
52 Raris para pemimpin Yahudine punika mabaos ring Hyang Yesus sapuniki,
“Mangkin tiang sami uning ragane yakti karangsukin buta kalane.
Dane Abraham punika sampun padem,
kenten pada para sinoman.
Nanging ragane ngandikayang,
‘Anake sane ninutin pengandikan Tiange,
nenten ja jagi padem salamin-laminne.’
53 Dane Abraham punika sampun padem,
kenten pada para sinoman sampun padem.
Ngudake ragane ngrasa agengan kapining dane Abraham ajin iragane makasami?
Manut ragane sirake ragane puniki?”
54 Raris Hyang Yesus masaur sapuniki,
“Yening Tiang ngrereh kaagungan Tiange praragan,
kaagungan punika nenten ja wenten artine.
Nanging Ajin Tiange sane ngagungang Tiang.
Ragane ngaku-ngaku nyembah Sang Hyang Aji.
55 Sujatine ragane nenten uning Ida,
nanging Tiang uning Ida.
Yening Tiang ngandika wantah Tiang nenten uning Ida,
Tiang anak bogbog pateh sekadi ragane.
Nanging Tiang uning Ida,
tur Tiang ninutin pengandikan Idane.
56 Ajin ragane dane Abraham seneng pisan krana jagi nyingakin sapengrauh Tiange.
Dane sampun nyingak tur dane seneng.”
57 Raris para pemimpin Yahudine mabaos ring Hyang Yesus sapuniki,
“Ragane dereng mayusa seket tiban!
Sajake ragane sampun nyingakin dane Abraham?”
58 Raris Hyang Yesus masaur sapuniki,
“Tiang ngandikayang sane patut,
sujatine sadereng Abraham maurip,
Tiang sampun wenten.”
59 Raris anak Yahudine sami ngambil batu jagi nimpuginf Hyang Yesus kantos padem.
Nanging Hyang Yesus ngengkebin raga,
raris matilar saking genah agung mabakti kapining Sang Hyang Pengardi.